Люксембургийн Ерөнхий сайд Ксавьер Беттел өнөөдөр ЕХ-ны дээд хэмжээний уулзалтын үеэр Украин, Молдав улсад Европын холбоонд нэр дэвшигчийн статус олгосон тухай твиттер хуудсаараа дамжуулан мэдэгдэв.
“Европын зөвлөл Украин, Молдав улсад нэр дэвшигч орны статусыг олгосон. Түүхэн мөч, Украины ард түмэнд итгэл найдвар төрүүлэх дохио" гэж Ерөнхий сайд бичжээ.
Өнгөрсөн долоо хоногт Украины ЕХ-нд элсэх хүсэлтийг Европын холбооны комисс дийлэнх олонх дэмжсэн бөгөөд өнөөдөр эхээр Европын холбооны парламент Молдав, Украинд Европын холбоонд нэр дэвшигчийн статус олгох саналыг хүчтэй дэмжсэн юм.
Мөн Европын Зөвлөлийн Ерөнхийлөгч Чарльз Мишель "Гүржийн Европын хэтийн төлөвийг хүлээн зөвшөөрөхөөр шийдсэн бөгөөд чухал ач холбогдолтой асуудлуудыг шийдвэрлэсний дараа нэр дэвшигчийн статус олгоход бэлэн байна" гэж мэдэгдэв.
Бельгийн Ерөнхий сайд Александер Де Кроу дээд хэмжээний уулзалтын өмнө Украинд ЕХ-нд нэр дэвшигчийн статус олгох нь Орос Украины эсрэг явуулж буй түрэмгийллийн харгис дайны үед Киевт дэмжлэг үзүүлэх чухал “бэлэгдлийн мессеж” гэж мэдэгджээ.
Украины Ерөнхийлөгч Владимир Зеленский Европын холбоо Украинд нэр дэвшигчийн статус олгох шийдвэр гаргасныг сайшааж, энэхүү хөгжлийг “өвөрмөц бөгөөд түүхэн” мөч гэж нэрлэв.
“Европын холбооны удирдагчдын [Европын зөвлөлийн дээд хэмжээний уулзалт] Украинд нэр дэвшигчийн статус олгох шийдвэрийг чин сэтгэлээсээ сайшааж байна. Энэ бол Украин-ЕХ-ны харилцааны өвөрмөц бөгөөд түүхэн мөч” гэж Зеленский твиттер хуудсандаа бичжээ.
